ಮೈತ್ರಿ ಸಂದೇಶ (Message of Peace, Kannada)

ಗ್ರಂಥಕರ್ತ:

ಹಜ್ರತ್ ಮಿರ್ಜಾ ಗುಲಾಂ ಅಹ್ಮದ್

ಮುನ್ನುಡಿ

ಅಹ್ಮದಿಯಾ ಮುಸ್ಲಿಂ ಸಂಘಟನೆಯ ಸ್ಥಾಪಕರಾದ ಹಝರತ್ ಮಿರ್ಝಾ ಗುಲಾಂ ಅಹ್ಮದ್ ತಮ್ಮ ಮರಣದ ಎರಡು ದಿನ ಮೊದಲು ಬರೆದ ಒಂದು ಉರ್ದು ಉಪನ್ಯಾಸದ ಕನ್ನಡಾನುವಾದವಾಗಿದೆ ಇದು.

1908ನೇ ಇಸವಿ, ಮೇ 31ರಂದು ಲಾಹೋರಿನಲ್ಲಿ ಸೇರಲು ನಿಶ್ಚಯಿಸಿದ ಸಮ್ಮೇಳನಕ್ಕಾಗಿ ತಯಾರಿಸಲ್ಪಟ್ಟ ಈ ಪ್ರಬಂಧವು ಆ ಮಹಾತ್ಮರ ಮರಣದ ನಿಮಿತ್ತ, ಜೂನ್ 21ರಂದು ಲಾಹೋರ್ ಯುನಿವರ್ಸಿಟಿ ಹಾಲಿನಲ್ಲಿ ಜಸ್ಟಿಸ್ ಪಿ.ಸಿ. ಚಟರ್ಜಿಯರ ಅಧ್ಯಕ್ಷತೆಯಲ್ಲಿ ಸೇರಿದ ಸಮ್ಮೇಳನದಲ್ಲಿ ಓದಲ್ಪಟ್ಟಿತು. ಹಿಂದು ಮತ್ತು ಮುಸ್ಲಿಂ ಧುರೀಣರೊಳಗೊಂಡ ಐದು ಸಾವಿರಕ್ಕೂ ಮಿಕ್ಕಿದ ಜನರು ಭಾಗವಹಿಸಿದ ಆ ಸಭೆಯಲ್ಲಿ ಪಂಜಾಬ್ ಚೀಫ್ ಕೋರ್ಟ್ ವಕೀಲರಾಗಿದ್ದ ಖಾಜಾ ಕಮಾಲುದ್ದೀನ್ ಸಾಹೇಬರು ಇದನ್ನು ಓದಿದರು.

ಭಾರತದಲ್ಲಿ, ಮುಖ್ಯವಾಗಿ ಪಂಜಾಬಿನಲ್ಲಿ ಆ ಕಾಲದಿಂದಲೇ ಗೋಚರಿಸುತ್ತಿದ್ದ, ಹಿಂದು-ಮುಸ್ಲಿಂ ಪೈಪೋಟಿಯು, ಭಾರತ ಭೂಖಂಡದ ಶಾಂತಿಯನ್ನೂ ಕ್ಷೇಮಾಭಿವೃದ್ಧಿಗಳನ್ನೂ ಕೆಡಿಸಿ ದುರಾವಸ್ಥೆಯೆಡೆಗೆ ಕೊಂಡೊಯ್ಯುವುದೆಂದು ತನ್ನ ಆಧ್ಯಾತ್ಮಿಕ ದೂರದೃಷ್ಟಿಯಿಂದ ಮುಂಚಿತವಾಗಿಯೇ ತಿಳಿದ ಆ ಮಹಾಪುರುಷರು ಹಿಂದುಗಳನ್ನೂ ಮುಸ್ಲಿಮರನ್ನೂ ಪರಸ್ಪರ ಒಂದುಗೂಡಿಸುವ ಒಂದು ಮಹಾ ಪ್ರಯತ್ನದಲ್ಲಿ ತೊಡಗಿದ್ದರು.

ಹಝರತ್ ಅಹ್ಮದ್ ಲಾಹೋರಿನಲ್ಲಿ ತಮ್ಮ ಕೊನೆಯ ಯಾತ್ರೆ ನಡೆಸಿದ ಸಂದರ್ಭದಲ್ಲಿ ಹಲವು ಪ್ರಸಿದ್ದ ಹಿಂದು ಮುಸ್ಲಿಂ ಧುರೀಣರು ಆ ಮಹಾತ್ಮರನ್ನು. ಆಗ, ತಾನು ಒಂದು ಮೈತ್ರಿ ಸಂಘವನ್ನು ಸ್ಥಾಪಿಸಲು ಉದ್ದೇಶಿಸಿರುವೆನೆಂದೂ ಅದಕ್ಕೆ ಆವಶ್ಯವಿರುವ ಸಹಾಯ ಸಹಕಾರಗಳನ್ನು ನೀಡಬೇಕೆಂದೂ ಅವರೊಡನೆ ಹಝ್ರತ್ ಅಹ್ಮದ್(ರಿ) ಅಪೇಕ್ಷಿಸಿದ್ದರು. ಹಾಗೆ ಲಾಹೋರಿನ ಸಮ್ಮೇಳನವು ಏರ್ಪಟ್ಟಿತು.

ಹಿಂದು ಮುಸ್ಲಿಂ ಮೈತ್ರಿಗಾಗಿ ಕೊನೆಯ ತನಕ ಪ್ರಯತ್ನಿಸಿದ ಓರ್ವ ಮಹಾ ಪುರುಷರ ಈ ವಿಶಿಷ್ಟ ಕೃತಿಯನ್ನು ಕನ್ನಡದಲ್ಲಿ ಭಾಷಾಂತರಿಸಲು ಸಾಧ್ಯವಾದುದರಲ್ಲಿ ನನಗೆ ಬಹು ಸಂತೋಷವಿದೆ. ಉರ್ದುವಿನಿಂದ ಕನ್ನಡಕ್ಕೆ ಭಾಷಾಂತರಿಸುವ ಕಾರ್ಯದಲ್ಲಿ ನನಗೆ ಸಕಲ ನೆರವಿತ್ತು ಸಹಕರಿಸಿ ಪ್ರೋತ್ಸಾಹಿಸಿದವರಿಗೂ ಇದನ್ನು ಪ್ರಕಟಿಸುವುದರಲ್ಲಿ ಸಕಲ ಸಹಕಾರಗಳನ್ನಿತ್ತ ಎಲ್ಲರಿಗೂ ನಾನು ಋಣಿಯಾಗಿದ್ದೇನೆ.

ಮತೀಯ ಘರ್ಷಣೆಯ ಕರಿನೆರಳಿನಲ್ಲಿ ಕಾಲಕಳೆಯುವ ಭಾರತ ಭೂಖಂಡದ ಜನಕೋಟಿ ಈ ಯುಗಪುರುಷರ ಉಪದೇಶ, ನಿರ್ದೇಶನಗಳನ್ನನುಸರಿಸಿ ವರ್ತಿಸಲು ಪ್ರಯತ್ನಿಸಿದರೆ, ಹಾ! ಎಷ್ಟು ಒಳ್ಳೆಯದು !

ಅನುವಾದಕ

ಮಂಜೇಶ್ವರ

3-2-1975.