Holy Quran with Oriya translation

ବିଶ୍ୱବ୍ୟାପ୍ତ ଅହମଦିୟା ମୁସଲିମ ସଂପ୍ରଦାୟର ଶତବାର୍ଷିକୀ ପୂର୍ତି ଅବସରରେ ୧୯୮୯ ମସିହାରେ ପବିତ୍ର କୁରଆନର ଓଡିଆ ଅନୁବାଦିତ ସଂସ୍କରଣ ପ୍ରଥମ ଥର ପାଇଁ ବ୍ରିଟେନସ୍ଥିତ ଇସଲାମାବାଦ ଠାରେ Islam International Publication ଦ୍ୱାରା ପ୍ରକାଶିତ ହୋଇଥିଲା । ତେବେ ପ୍ରଥମ ସଂସ୍କରଣରେ ମୁଦ୍ରିତ ଲିପିଗୁଡିକ କ୍ରମେ କ୍ରମେ ଅସ୍ପଷ୍ଟ ଓ ଦୃଷ୍ଟିକଟୁ ହେଉଥିବା ଯୋଗୁଁ ଏବଂ ଏବେ ଏହାର ଚାହିଦା ଦୃଷ୍ଟିରୁ ଅହମଦିୟା ଜମାଅତର ମହାମାନ୍ୟ ପଞ୍ଚମ ଖଲିଫାଙ୍କ ସଦୟ ସ୍ଵୀକୃତି କ୍ରମେ ଆଧୁନିକ ଜ୍ଞାନକୌଶଳରେ କମ୍ପ୍ୟୁଟର ଶବ୍ଦ ଅଳଙ୍କରଣ ଦ୍ୱାରା ପୁନଃମୁଦ୍ରଣ କରାଯାଉଛି । ସେଥିପାଇଁ ଏହି ଓଡିଆ ଅନୁବାଦକୁ ପ୍ରଥମ ସଂସ୍କରଣ ଅନୁଯାୟୀ ଅବିକଳ ଭାବେ ପ୍ରସ୍ତୁତ କରାଯାଇଛି ଏବଂ ଏହାର ଦ୍ୱିତୀୟ ପ୍ରକାଶନର ଦାୟିତ୍ଵ ନଜାରତ ନଶରୋ ଇଶାଅତ, କାଦିୟାନ ବହନ କରିଛନ୍ତି । ପୁରାତନ ସଂସ୍କରଣରେ କେତେକ ଶବ୍ଦଗତ ତ୍ରୁଟି ରହି ଯାଇଥିଲା, ଯାହାକୁ ବର୍ତ୍ତମାନ ସଂସ୍କରଣରେ ସଂଶୋଧନ କରାଯାଇଛି ।

ଏହି ପରିପ୍ରେକ୍ଷୀରେ ଅହମଦିୟା ମୁସଲିମ୍ ସମ୍ପ୍ରଦାୟ ଅନ୍ତର୍ଗତ ଖିଲାଫତର ସ୍ୱର୍ଗୀୟ ଅନୁଷ୍ଠାନ ଅଧୀନରେ ଏହାର ଖଲିଫାମାନଙ୍କର ଦିଗ୍‌ଦର୍ଶନ ଅନୁଯାୟୀ ପବିତ୍ର କୁରଆନକୁ ପୃଥ‌ିବୀରେ ବହୁଳ ଭାବରେ କଥ୍ତ ବିଭିନ୍ନ ଭାଷାରେ ଅନୁବାଦ କରିବାର ଉଚ୍ଚାଭିଳାଷ ରଖି ଏହି ମହାନ କାର୍ଯ୍ୟ ହାତକୁ ନିଆଯାଇଛି । ତେବେ ଈଶ୍ଵରଙ୍କ ଅପାର କରୁଣାରୁ ଅହମଦୀୟା ମୁସଲିମ ସମ୍ପ୍ରଦାୟ ଦ୍ୱାରା ଅଦ୍ୟାବଧୂ ୭୫ରୁ ଅଧିକ ଭାଷାରେ ପବିତ୍ର କୁରଆନର ଅନୁବାଦ କରାଯାଇ ସାରିଲାଣି । ସେହି ଅନୁବାଦ ମଧ୍ଯରୁ ଓଡିଆ ଅନୁବାଦ ଅନ୍ୟତମ।

୧୯୮୯ ମସିହାରେ ପ୍ରକାଶିତ ଓଡିଆ ଅନୁବାଦିତ କୁରିଆନକୁ ଡଃ. ମୁହମ୍ମଦ ଅନୱାରୁଲ ହକ୍ ଓ ଅବଦୁଲ କାଦର ଖାନ୍, ଏମ. ଏ. ଅନୁବାଦ କରିଥିଲେ । ତାହାକୁ ପୁନଃ ପ୍ରକାଶନ କରିବା ସକାଶେ ଅହମଦିୟା Review Committee, ଓଡିଶାର ଅଧ୍ଯକ୍ଷ ଇଂ. ଗୌଶନ ଖାନ ସାହେବ, କେରଙ୍ଗଙ୍କ ତତ୍ତ୍ୱାବଧାନରେ ଓଡ଼ିଆ Composing, Proof Reading ଓ ସମୀକ୍ଷା ଇତ୍ୟାଦି ସମସ୍ତ କାର୍ଯ୍ୟ ସମାହିତ ହୋଇଛି । ଏହି କାର୍ଯ୍ୟରେ ମୌ. ଅନୱର ଅହମଦ ଖାନ ସାହେବ, ଇନଚାର୍ଜ ଓଡିଆ ଡେସ୍କ ନଳାରତ ନଶରୋ ଇଶାଅତ, ମୌ. ଶେଖ ମୁଫସୀର ଅହମଦ ସାହେବ, କେରଙ୍ଗ ଓ ଆଲିୟା ମହମୁଦ ସାହିବା, M.A. (Edu) ପ୍ରମୁଖ ଅତ୍ୟନ୍ତ ପରିଶ୍ରମ ଓ ନିଷ୍ଠାର ସହିତ ସହଯୋଗ କରିଛନ୍ତି । ସେ ସମସ୍ତଙ୍କୁ ଈଶ୍ୱର ଉତ୍ତମ ପ୍ରତିଫଳ ପ୍ରଦାନ କରନ୍ତୁ ।

ଅଲ୍ଲୀତାଲା ପବିତ୍ର କୁରଆନର ଏହି ଓଡିଆ ଅନୁବାଦିତ ପ୍ରକାଶନକୁ ପ୍ରତ୍ୟେକ ଦୃଷ୍ଟିକୋଣରୁ କଲ୍ୟାଣ ଦାୟକ କରନ୍ତୁ । ଏହା ପାଠକମାନଙ୍କ ଜ୍ଞାନତୃଷ୍ଣା ମେଣ୍ଟାଇବାରେ ଅତ୍ୟନ୍ତ ଫଳପ୍ରଦସିଦ୍ଧ ହେଉ ତଥା ମାନବଜାତି ପାଇଁ ସତଶିକ୍ଷାର ଉତ୍ସ ହେଉ । ପବିତ୍ର କୁରଆନର ଜ୍ୟୋତି ଦ୍ୱାରା ସମଗ୍ର ମାନବଜଗତ ଆଲୋକିତ ହେଉ । ଆମିନ୍ ।

(ହାଫିଜ ମଖ୍ଦୁମ ଶରିଫ୍)

ନାଜରତ ନିଶରୋ ଇଶାଅତ

କେନ୍ଦ୍ରୀୟ ପ୍ରସାରଣ ଓ ପ୍ରକାଶନ ନିର୍ଦ୍ଦେଶାଳୟ, କାଦିୟାନ

January, 2019